البطاطس
معشوقة الكل ، دائما تكون طلب جانبي مع اي اطباق في اي مطاعم ، ويمكن يكون طلبنا الاول قبل اي طلب
اكيد ماراح اكتب نبذه عنها بالطريقة الويكيبيدية ! لكن تعرفوا انه لها ٤٠٠٠ نوع مختلف ،، وانه انواع كثير منها مستخدمة ومعروفة في الخارج .
بالنسبة لاسواقنا عندنا نوع واحد ، ونسأله دي بطاطس قلي ولا طبخ < نوع واحد وتعبانين فيه
والنوع الثاني البطاطا الحلوة ومانعتبره بطاطس لانه البعض يسميه جزر يمني.
لكن مؤخرا ومع دخول انواع كثير من الخضروات والفواكه المستوردة في الهايبرات الكبيرة بدأنا نتعرف على انواع جديدة وتتوسع افاق معرفتنا بالخضروات والفواكه.
طيب مع الانواع الكثير للبطاطس ، كيف نقسمها ؟ على اي اساس نختارها؟
الاختيار سهل جدا ،، يعتمد على ( انتي ايش ناوية تطبخي ) ؟ بمعنى نوع البطاطس اللي تختارها يعتمد على استخدامك لها ، وهذي صورة توضح لنا اكثر
ونختصر لكم الصورة ونشرحها شرح مبسط
انواع البطاطس
انواع نشوية : البطاطس الروسية اللي هي اللي تكون بنية متربة وكبيرة والبطاطس الروز الحمرا والبطاطس الكبيرة الصفرا < حبيبتنا ،، كلها انواع مرتفعة نشويا
ممتازة للقلي والخبز في الفرن واحسن انواع لعمل البطاطس المهروسة لانها تمتص الحليب والزبدة بسبب نشويتها.
وتكون قشرة هذا النوع من البطاطس سميكة نوعا ما وقوامها صلب زي الفجل.
انواع شمعية : اما البطاطس الصغيرة اللي تكون اصبعيات اللي يجي لونها ذهبي او نحاسي ، والنوع الهولندي والبطاطس السودا < امس جربتها في القلي طعمها يجنن وغير شكل ( لكن ترى هي مو للقلي )
وكل انواع البطاطس اللي تكون طولية وصغيرة دي ممتازة للاطباق اللي نحتاج في بطاطس متماسكة ماتنهري ( يعني ممتازة للسلق والغلي ) زي بطاطس السلطات والشوربات ، وتكون قشرتها ناعمة خفيفة وقوامها اخف من النشوي لكنها اكثر تحملا .
طيب ايش اخبار البطاطس البنفسجية؟
لونها روعة بصراحة ، دا النوع وسطي مابين النشوي والشمعي ، وافضل استخدام لها هو الشوي ، تكون متماسكة وفي نفس الوقت طرية.
.
.
وبالنسبة للبطاطس الحلوة او البطاطا فهي من نفس النوع والفصيلة النشوية ، تجي بالوان متعددة ، يعني مو دايما لونها برتقالي وهو الاشهر ، لكن منها بيج وكمان بنفسجي وهي مصدر اساسي للبيتاكاروتين،، وانشهرت بطريقة طبخ وحدة وهي خبزها في الفرن.
لكن مع زيارتنا للمطاعم بنكتشف اطباق منوعة ولذيذة للبطاطس الحلوة ( جربتو بطاطس ذا كاونتر المقلية؟ ) طعمها خيال
واكيد بعد جولتنا الصغيرة في عالم البطاطس انصحكم تزوروا الهايبرات وتشتروا انواع جديدة وتجربوا وصفات جديدة ، خلوا السفرة ملونة.
.
.
مجموعة طباخات السعودية / غادة جوهرجي
