السلام عليكم ورحمة الله وبركاته
القهوة في ايامنا الحالية صارت لايف ستايل وبرستيج وضرورة من ضروريات الحياة !
زمان القهوة كانت للاستمتاع بالنكهة وتعديل المزاج ( للكيّفين ) خصوصا ، لكن في ايامنا ومع اجيال الانستجرام وتويتر وسناب تشات ارتقينا بالقهوة لتصبح من اساسيات جدولنا اليومي.
يعني لازم نروح كل يوم نشرب قهوة ونتصور ، وياسلام لو صورنا اكوابنا وجنبها الدونات والكريب والبراونيز طبعا دا في المساء لكن اذا في الصباح لازم نصور الوافلز والبانكيك معاها،، ثقافة جديدة لكن جميلة ومن باب ( الكولنة ) على رأي هتون قاضي
اذا كنتوا من جيل الكولنة فأكيد القهوة من ضمن جدولكم اليومي ، اجتماع في كوفي شوب ودردشة وقهوة وتصوير ، وطبعا لازم يتغير الكوفي شوب كل مره من باب التغيير والتنويع.
لكن كمان دا يدل انه القهوة هنا ليست لتعديل المزاج ، لكن حياة اجتماعية عندالبنات والشباب واكيد لايف ستايل.
من فترة كان دانكن دونات من المكونات الرئيسية لأي صورة فيها قهوة ، لكن مع انتشار ثقافة القهوة انتشرت معها ايضا الكافيهات المنوعة والتي ترضي جميع الاذواق ، والمنافسة على اشدها ،، من داكن دونات الى ستاربكس مرورا بسياتل وكوستا وبارنيز واسماء كثييير.. والمنافسة بينهم وصلت لمواقع التواصل الاجتماعي. وكل ماكان الكوفي جديد كان الطلب عليه اكبر خاصة لو انه فرع لكوفي شوب عالمي ومعروف ( واتعرفوا عليه من خلال السفر ) هنا عاد قمة الكولنة ،، واكبر مثال تيم هورتنز المنافس لدنكن دونات وشبيهه وكوفي بين .
تيم هورتنز بعد دبي وتجربة الناس له هناك اصبح له شهرة ومجرد فتح اول فرع له في السعودية في الرياض كان الاقبال عليه حماسي ، ومن باب عرض التجارب انا جربته وهو افضل من دانكن دونات ، نكهة القهوة الامريكية غنية وتفرق عن دنكن ، الدونات منوع اكثر والمنيو فيه اضافات اكثر واتعددت فروعه مؤخرا.
والقهوة العربية دخلت في المنافسة وصرنا نشوف اكتر من كوفي شوب يقدم لنا دلة تفوح منها رائحة القهوة المخلوطة بالهيل والقرنفل ( المسمار ) ، وهي منتشرة كثير في المولات.
ودخل معاهم على خط المنافسة الستايل التركي ، المتثمل في القهوة التركية والشاي التركي على اصوله وطبعا عن طريق فروع لكافيهات تركية فتحت في المملكة مؤخرا ومنهم مادو وسيميت سراي بفرعهم المتعددة. ووصلت فروعهم لنيويورك ولندن وطبعا بيعتمدوا على الشاي التركي المزروع في منطقة ريزا والذي المتميز بالنكهة القوية ويحضر بالسماور او بتقنية البرادين.
..
لكن ومع تعدد الكافيهات تظل هناك مساحة خاصة لاستذواق القهوة والاستمتاع بها بعيد عن جو الايف ستايل وطبعا نقصد القهوة المعدة في المنزل او المكتب ،، ومع انتشار صانعات القهوة من مختلف الماركات تعددت انواع القهوة لترضي جميع الاذواق . فمنها مايعتمد على الكبسولات متعددة الاحجام،، ومن ضمنهم صانعات قهوة نسبريسو ونسكافيه وستار بكس ، ومنها ماتعتمد في تحضيرها على القهوة المحمصة سواء كانت مطحونة ام لا ومنهم ماركة دومينغو والصانعات المنزلية الصغيرة.
وبعد كلامنا الكوول ، خلونا نتعرف على انواع القهوة ،، ونخلي اللايف ستايل مطّعم بالثقافة والمعرفة ، وهذي صورة توضح انواع القهوة وتركيزها والمواد المضافة ، وكمية الحليب بالنسبة للقهوة لكل نوع من انواع القهوة المعروفة ،، اتعرفوا على قهوتكم المفضلة ومكوناتها
طيب هل للقهوة فوائد ؟
اكيد لانها تحتوي على العديد من المكونات الكيميائية المحفزة للجسم ، واذا تم شربها باعتدال فإننا سنجني فوائدها ومن ضمنها
تسكين الألم والصداع بسبب مادة الكافيين، ولذلك نجدد أن ادوية الصداع والمسكنات تحتوي علىي الكافيين.كما أنها تزيد من التركيز وتقي من الاكتئاب واثبتت الدراسات انها تقي
من انواع معينة من السرطان.
وقانا الله واياكم شر الأمراض .
واستمتعوا بقهوتكم ،،،
مجموعة طباخات السعودية / غادة جوهرجي
