مرحبا بالجميع وكل عام وانتم بخير
الشعبنة مصطلح حجازي قديم جدا ، لعادة حجازية أصيلة وجميلة في شهر شعبان احتفالا باقتراب شهر رمضان المبارك ،،
وتقام فيه الموائد العامرة بين الأهل ،الحباب.
والشعبنة فرصة لاجتماع العيلة والاهلية ، كانت فكرتها زمان انهم يجتمعو يطلعو يغيرو جو ويتسلو وياكلو ويلعبو علشان لما يجي رمضان الكل يتفرغ للعبادة من صوم وصلاة وتراويح. ومنها مظهر بسيط يحتفلو فيه بقدوم رمضان ولياليه،،
والشعبنة مالها يوم معين ، لكن كل ماكانت متأخرة وقريبة من رمضان تكون أحلى، ومالها أكل مخصص، كل ست بيت تجيب اللي تقدر عليه من أكل وشرب وتسالي والعاب، ويجتمعو بره البيت على البحر في جدة او الهدا في الطايف وممكن مزدلفة او عرفة في مكة، وتكون من اول النهار لحد ساعات الفجر الأولى.
وماتقتصر على العوائل ، ممكن كمان تكون جمعات شباب ، وفيه اللي يشعبنو مرتين وثلاة مع الاهل ومع الاصحاب.
واكيد يهمنا اليوم كمان نعرف بما اننا مدونة طبخ ، ايش يطبخو او ايش الاكل المخصص للشعبنة؟
طبعا مافي اكل معين للشعبنة، غالبا اهل جدة يشعبنو بوليمة سمك خاصة انه رمضان ماياكلو فيه اي نوع سمك، وممكن تكون الشعبنة ذبيحة خاصة اذا كان عدد اللي يشعبنو كبير.
والبعض يمشيها خفايف وتعتيمة ، وكثير يطبخو بره البيت ، يطلعو بقدورهم وأكلهم والسلطات ويبدا الطبخ والنفخ ،،
يمكن حاليا اتغيرت بعض العادات والناس بدأت تعتمد على الاكل الجاهز ،والبوفيهات بدأت كمان تظهر ايام الشعبنة لكن فكرة جمعة العيلة في اواخر شعبان مازالت عادة متأصلة وبيحرص عليها الجيل الجديد اللي حاب يحيي العادات الجميلة.
غادة جوهرجي
